Frauenverein Stadel

Frauenvereinsreise 2023

Murtenreise 28. Oktober 2023 (ein beinahe historisches Datum) es war Vollmond, es gab eine partielle Mondfinsternis und zudem wurde an diesem Tag die Sommerzeit auf Winterzeit umgestellt.

Füfzäh Fraue händ sich a dem spezielle Tag uufgmacht, zum mit eme Bus vum Hess Car uf Murte z’reise.
Es isch na tunkel gsi wo mir eus am Morge am halbi achti zum ischtige bim Dorfzentrum troffe händ.
D‘ Fraue vu Raat, Windli und Schüpfe sind scho im Bus gsässe.
D' Mägi häd wunderbari Lunchpäckli verteilt und ich ha mi echli ängschtlich gfrögett, ob bis Murte kein Halt und sie well halt nüd, dass öpper verhungere müess. De Chauffeur häd na bekannt gä, dass wänn öpper ufs WC müess, dänn sell er das e halb Schtund vorher, amälde, schriftlich i drüfacher Usfüerig, nei Blödsinn.

So simmer losgfahre, s’isch langsam heller worde, d’Sunne isch ufgange wo mer uf der Autobahn Richtig Aarau gfahre sind.
Eus z’lieb händs di ganze Berner Alpe usegnu gha und am Horizont ufgschtellt, Hammer!
Mit schwätze, Kafi trinke und Znüni ässe simer gäge Murte zuegfahre. Rächts isch gli de See uftaucht, dä isch so blau gsi, dass de Verdacht ufcho isch, sie hebid äxtra für eus e blaui Folie drüberschpannt. So schön!

Z‘ Murte simmer usgschtigees und es paar Schritt durs Murtetor is Schtettli ie gloffe. Det hämmer dänn euse Schtadtfüehrer troffe. Dä häd eus verschproche er wärd eus nüd langwile mit irgendwelche gschichtliche Date und so.
Das Verschpräche häd er dänn aber nüd würklich ghalte und er häd dänn eusi Geduld scho zimlich schtrapaziert mit der Ufzellig vu all dene Familie, Militärpersone und de ganze High society wo im Mittelalter zMurte s‘ Säge gha händ.

Leider isch aber eis Gheimnis trotz dem halbschtündige Vortrag doch nüd G’lüftet worde, nämli, warum de Adrian
von Bubenberg, wo det vis à vie vum Berntor uf ere Brunnesüle i Schtei gmeisslet schtaht, nie uf eme Ross abbildet isch, wo er doch en Ritter gsi isch. Ewig schad!

Äntli, wo mer scho tänkt händ mir wärdid de Ganz Tag am Brunnen vor dem Tore verbringe, isch es dänn echli witergange,
mir sind durs Tor dur wider is Schtettli iecho. Es isch dänn es paar Meter fürsi gange und mir sind uf e Plattform cho, wo mer e wunderbari Ussicht uf de See und in Jura übere gha händ.
Irgend wie häd gar niemer me so richtig zueghört was euse guet Fuehrer verzellt häd.
Mer händ dänn na erfahre wievill Prozänt vu de Bevölkerig i de Reformation, katholisch blibe sind, ja au das muess eim emal gseid wärde.
D'Mägi häd dänn euse Füehrer emal müesse dra erinnere, dass mer settid echli fürsi mache, mir wellid ja schliesslich au na öppis vum Schtettli gseh...
...und am halbi zwölfi seig im Hotel Murte dänn de z‘ Mittag parat. Das häd er dänn begriffe, aber wos dänn äntli interessant worde wär, nämli mit schöne alte Hüser, Gässli, Brünne, Feschtige, di berüemti Murtelinde und phantastischi Gärte a de Schtadtmur hämer das alles im Sauseschritt müese absolviere, will mer kei Zit meh gha händ.

Wo mer dänn wider i de Hauptgass aglangt sind und di einte na händ welle en Nidlechueche poschte,häd di säb Konditorei wo angeblich de bescht macht, zue gha.
Di einte sind dänn doch na dezue cho und dä wird ja au guet gsi si. Dänn simmer wider zum Berntor us und zum Hotel Murte abe gloffe. Det hämmer bineme feine Mittagässe euse Fruscht wider chöne abboue.

Will mer am See gsi sind, häts Fisch gää und au anders, es isch sehr fein gsi. Gli häds gheisse, alles wider ischtige, Mir händ ja na es Rendevous gha mit em Roger Federer i de Jura-Kafiwält. Zerscht häts en feine Kafi gäh.

Und dänn isch es losgange uf de Rundgang. Mir sind um de Egge cho und tatsächlich da schtaht er, de Roger Federer himself. Er häd zwar echli wächsern usgseh und häd au nüd vill gseit, aber das cha mer vunere Wachsfigur au nüd würkli erwarte.
Er isch dänn aber doch na uf es paar Selfis verewiget worde.
Bimene Rundgang durs Museeum hämmer vill erfahre über Kafi, d‘ Entwiklig vu de erschte Kafimaschine und vielles was rund um d‘Wält im Zämehang mit Kafi so alles passiert isch.

Ganz zfride und liecht duregschüttlet simer dänn wider usecho.
Und scho isches Zit gsi für d‘ Heireis .
Em Jura na, links de Wisseschtei, rächts s,Bernermittelland so simmer wider de Heimat zuegfahre. Pünktlich am halbi sächsi simmer wider diheim acho.

Mir tanked de Mägi herzlich für’s Organisiere vu dere würklich schöne und glungene Reis.